انتبهت لدمعها بالهدب والكحل ســــــــــال
لين جفت عينها دمع والقاع ارتـــــــــــوى
وابتدت لحضة جفا وانتهت لحضة وصال
وأنطفى نور السعادة واحسب انه ضــوى
ما اكتفيت من الهوى والغرام أربع ليـــال
واقفت أيام التلاقي وجا وقت النـــــــــوى
كنت ابسلى وابتسم والتفت عنها شــــمال
لا قويت الصد عنها ولا قلبي قــــــــــوى
ما هقيت ان الهوى عذب قلوب الــــرجال
لين ضاع القلب مني وتفكيري ســــــــوى
رحت أدور دفوة الشمس ضيعت الضلال
جيت اطفي شعلة النار والقلب انكــــــوى
ماهقيت ان السعادة خيال في خــــــــــيال
تروى قلوب الحبايب وقلبي مـــــــا روى
كنت ابشتال الهوى والهوى ثقل الجبــــال
وان تحملت الجبل ما تحملت الهـــــــــوى
كنت ابسلى بالهوى والهوى صعب المنال
ما رضا لي حظي اللي طواني وانطــــوى
قلت لا فراحي تعالي ولا قالت تعـــــــــال
والخفوق ان قلت ابقبل على صدي نـــوى
الله أكبر لا شرقت شمس يتلاهــــــا زوال
كيف ابفرح في صباح مع الليل استـــوى؟
لاحصل بالحب قسمة ولا جا لي مجـــــال
غير اشوف معاند الجرح وعنــــاد الدوى
شبت النيران واقفت وجاء رد الســــــؤال
ما تشب النار يا كود يوصلها هـــــــــوى